Líftæknilyf sem hefur mikil áhrif á lífsgæði fólk með fjölfæðuofnæmi

Notkun líftæknilyfja gæti rutt sér til rúms sem fyrirbyggjandi meðferð við fæðuofnæmi hérlendis á næstu árum. Rannsóknir á ofnæmislyfinu Xolair, sem kynntar voru á Íslandi í vikunni, sýna fram á getu lyfsins til að gerbreyta lífi fólks með fjölfæðuofnæmi. Þetta segir Sigurveig Þ. Sigurðardóttir, yfirlæknir ónæmis- og ofnæmislækninga við Landspítalann, í Morgunblaðinu í dag.

Sigurveig hélt fyrirlestur á málþingi Astma- og ofnæmisfélags Íslands, fimmtudaginn 15. janúar. Um þrjátíu sátu í sal og önnur tuttugu fylgdust með á netinu. Málþingið var í hringsal Barnaspítala Hringsins. Þar kynnti Sigurveig rannsóknir á notkun lyfsins ásamt Rebekku Sigrúnu D. Lynch.

Hækka ónæmisþröskuldinn

„Þessar rannsóknir sem við kynntum á málþinginu sýndu að hjá því fólki sem var gefið þetta lyf hækkaði þröskuldurinn fyrir því að fá ónæmisviðbrögð, þannig að fólk sem hefði áður ekki þolað að borða ýmsar fæðutegundir í snefilmagni gat það eftir að hafa fengið lyfið. Þeir einstaklingar voru þá í mun minni hættu á því að fá bæði minni háttar og alvarleg ofnæmisviðbrögð við þeim ofnæmisvöldum sem prófaðir voru,“ segir Sigurveig í Morgunblaðinu.

Þar kemur fram að lyfið sé notað við ofnæmistengdum sjúkdómum á borð við astma og nefholusýkingum með sepum hérlendis. Lyfið sé ekki skráð við fæðuofnæmi á Íslandi þótt það hafi verið skráð sem slíkt í Bandaríkjunum í rúmt ár. Sigurveig segir það gefið einu sinni í mánuði með sprautu undir húð og virki gegn ofnæmismótefnum líkamans. Þannig virki það mun breiðar en ofnæmislyf sem virki einungis gegn einni tegund ofnæmisboðefna.

„Mörg ofnæmislyf virka einungis gegn virkni boðefna í ónæmissvarinu, en þetta virkar gegn ofnæmismótefnunum og kemur í rauninni í veg fyrir ónæmissvar líkamans, þannig að það losnar ekki neitt boðefni sem þarf að blokka,“ segir Sigurveig í Morgunblaðinu og að líðan sjúklinga geribreytist í mörgum tilfellum.

„Það getur verið mjög bagalegt og minnkað lífsgæði fólks töluvert að búa við fjölfæðuofnæmi, bæði fyrir börn og einstaklinga sem þjást af slíku ofnæmi sem og fjölskyldur þeirra, en fyrirbyggjandi lyf á borð við þetta draga töluvert úr hættunni við að óþekkt fæða valdi ofnæmisviðbrögðum og bæta þar með lífsgæði þeirra sem eru með svona ofnæmi.“ Sigurveig segir að hver skammtur lyfsins geti hlaupið á hundruð þúsunda króna erlendis.

Ræddu afnæmingar

Morgunblaðið sagði einnig frá því að þær Sigurveig og Rebekka hefðu einnig kynnt afnæmingarmeðferðir fyrir fæðu á málþinginu. „Það er notast við afnæmingarmeðferðir við fæðuofnæmi víða erlendis, en við erum ekki farin að gera það hér,“ segir hún. Slíkar meðferðir, þar sem ofnæmisvaki er innbyrtur með reglulegu millibili í vaxandi magni í þrjú ár, virka að hennar sögn í um 50% tilfella fæðuofnæmis. Hérlendis eru afnæmingarmeðferðir við gras- og birkiofnæmi tíðar, og í undantekningartilfellum við dýraofnæmi.

„Líftæknilyfið, Xolair, hefur einnig verið notað samhliða afnæmingarmeðferðum en í rauninni virðist það hjálpa alveg jafn mikið eitt og sér,“ segir Sigurveig í Morgunblaðinu. „En þá ertu ekki að breyta grunnónæmissvari fólks neitt, heldur hækka þennan þröskuld.“

Viðtalið við Sigurveigu var í kjölfar erindisins á málþingi Astma- og ofnæmissamtakanna.